Fasnacht 2025

Als Chind hei vill de Traum moll gha,
wenni gross bi wirdi Führwehrmaa.
Will nid immer das wod wilsch bechunsch,
erfülle mir öis so de Wunsch.

Wenns z Lieschtel zünftig chunnt cho seiche,
und d Stroosse sich komplett uffweiche,
stönde si denn bald im Schilf,
drumm chömme d Lupos jetzte z Hilf.

Mit frohem Geischt und edlem Gmüet,
strahle mir unter de Hüet.
Wäg däm vrloot öis nie dr Muet,
will Durscht go lösche chömmer guet.

Usserdäm, me chas guet gsee,
im Altmärt uss wird Gutzi geh.
Dr Zyt voruss isch me am goo,
und wenn die chunnt, isch me scho doo.

Ä früsch polierti Rettigswacht,
professionell, massiv bedacht.
Söll dr schwirig Schritt lo glinge,
Miliz und Bruef zenander z bringe.

Damit das glatt cha funktioniere,
chömme mir bald ihzmarschiere
und stönde stramm, mir si nid schüüch,
parat mit öisne Füürwehrschlüüch.

Für jede Notfall- dasch doch klar,
will Nochwuchs sig schiins zimmlich rar.
S bescht Material das lauft nid rund,
wenn keine me an Ihsatz chunnt.

Passend wämmer das verbinde,
zum dene Lüt es Chränzli z winde,
wo in dr Freizyt umme hetze
und sich fürd Sicherheit ihsetze.

Die wo öis scho länger kenne,
mir si wie immer geech am brenne
und gönge eimoll meh ind Möscht,
öis het bis hüt no keine glöscht.